ഗൾഫ് പര്യടനത്തിന്റെ ഭാഗമായി ഫ്രഞ്ച് പ്രസിഡന്റ് ഇമ്മാനുവൽ മാക്രോൺ യുഎഇയിലെത്തി. ആഗോളതലത്തിലും ഗൾഫ് മേഖലയിലും നിർണ്ണായകമായ രാഷ്ട്രീയ മാറ്റങ്ങൾ സംഭവിക്കുന്നതിനിടയിലാണ് ഫ്രഞ്ച് പ്രസിഡന്റിന്റെ സന്ദർശനം. ഇരുരാജ്യങ്ങളും തമ്മിലുള്ള സാമ്പത്തിക, പ്രതിരോധ ബന്ധങ്ങൾ കൂടുതൽ ശക്തമാക്കുക എന്നതാണ് ഈ ഉന്നതതല സന്ദർശനത്തിന്റെ പ്രധാന ലക്ഷ്യം.
അബുദാബി അന്താരാഷ്ട്ര വിമാനത്താവളത്തിലെത്തിയ മാക്രോണിനെ യു.എ.ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ നേരിട്ടെത്തി സ്വീകരിച്ചു. ഉന്നതതല പ്രതിനിധി സംഘത്തിന്റെ സാന്നിധ്യത്തിലായിരുന്നു സ്വീകരണം. ഇരുരാജ്യങ്ങളുടെയും ദേശീയ ഗാനങ്ങൾ ആലപിച്ച ഔദ്യോഗിക ചടങ്ങിൽ ഫ്രഞ്ച് പ്രസിഡന്റിന് ഗാർഡ് ഓഫ് ഓണർ നൽകി ആദരിക്കുകയും ചെയ്തു.
ഗൾഫ് മേഖലയിലെ നയതന്ത്ര പര്യടനത്തിന്റെ ഭാഗമായി കുവൈറ്റ് സന്ദർശിച്ച ശേഷമാണ് മാക്രോൺ യുഎഇയിലെത്തിയത്. കുവൈറ്റിൽ അമീർ ഷെയ്ഖ് മിഷാൽ അൽ-അഹ്മദ് അൽ-ജാബർ അൽ-സബാഹുമായി അദ്ദേഹം കൂടിക്കാഴ്ച നടത്തിയിരുന്നു. യുഎഇയിലെ ഔദ്യോഗിക പരിപാടികൾക്ക് ശേഷം അദ്ദേഹം ബുധനാഴ്ചയോടെ ബഹ്‌റൈൻ, ഖത്തർ എന്നീ രാജ്യങ്ങളിലേക്കും തിരിക്കും.
മിഡിൽ ഈസ്റ്റിലെ നിലവിലെ സുരക്ഷാ-രാഷ്ട്രീയ സാഹചര്യങ്ങളും തന്ത്രപ്രധാന വിഷയങ്ങളും സന്ദർശന വേളയിൽ ചർച്ചയാകും. സാമ്പത്തിക പങ്കാളിത്തവും പ്രതിരോധ സഹകരണവും വർദ്ധിപ്പിക്കുന്നതിനൊപ്പം പ്രാദേശിക സമാധാനം ഉറപ്പാക്കുന്നതിനായുള്ള ചർച്ചകൾക്കും ഈ പര്യടനം വഴിവെക്കും.
Content Highlights: French President Emmanuel Macron arrived in the UAE on October 19, 2026, for an official visit and talks with UAE President Sheikh Mohamed bin Zayed Al Nahyan on strengthening bilateral relations, defence, security, artificial intelligence and new technologies.